ජවිපෙ ඉතිහාසය හා ලාංකේය දේශපාලන භූමිකාව
[සංස්කරණය]
ජ.වි.පෙ. ආරම්භය
ජනතා විමුක්ති පෙරමුණ මැයි ජනරැලියකදී
ජනතා විමුක්ති පෙරමුණ ලාංකේය දේශපාලන කේෂ්ත්රය තුළ සුවිශේෂී සටහන් තැබූ පක්ෂයකි. 1965 මැයි මස 14 වන වෙසක් පොහෝ දින ගාල්ල අක්මීමන දී පක්ෂය ආරම්භ කිරීමේ සාකච්ඡාව පවත්වන ලදී.පක්ෂයේ නිර්මාතෘ වූයේ රෝහණ විජේවීර මහතාය.අක්මීමන සාකච්ඡාව සඳහා හත්දෙනෙක් සහභාගී විය. ජවිපෙ ආරම්භ කිරීමේ අරමුණු වූයේ ලංකාවේ නිර්ධන පන්තියට රාජ්යබලය දිනා ගැනීමටය. ජවිපෙ බිහිවීම සදහා බලපාන ලද හේතූන් වූයේ පැරණි වමේ ව්යාපාරය සමසමාජ හා කොමියුනිස්ට් පක්ෂ ආණ්ඩුව සමග එකතුවීම, චීන සෝවියට් මතභේදය, රෝහණ විජෙවීරගේ මැදිහත්වීමද මේ සඳහා බලපාන ලදී. මේ කාල සීමාව තුළ ලංකා කොමියුනිස්ට් පක්ෂය චීන පිල හා රුසියානු පිල වශයෙන් දෙකට බෙදී තිබුනු අතර රෝහණ විජේවීර මහතා චීන පිලේ මතය පිළිගනිමින් එය නිවැරදිව ක්රියාත්මක කිරීමට උත්සාහ කරන ලදී.
ජනතා විමුක්ති පෙරමුණ පක්ෂයේ නිර්මාතෘ රෝහණ විජේවීර මහතා
නමුත් එය අසාර්ථක වෙයි. 1967 කියුබානු විප්ලවවාදි චේගුවේරාගේ මරණින් පසු කියුබානු ආදර්ශය ජවිපෙට බලපාන ලද අතර සුප්රකට පන්ති පහ අරබමින් ඉන් අනතුරුව දේශපාලන කේෂ්ත්රයට ප්රවෙශ විය. 1969 දී ඇත්ත පත්රය විසින් "සමගි පෙරමුණට පහර දීම සදහා තරුණයින් බාගන්නා CIA කෙමනක්" ලෙස ජවිපෙ හදුන්වා දෙන ලදී.මේ තත්ත්වය තුළ 1970 මැයි 12 වන දා රෝහණ විජේවීර මහතා අත්අඩංගුවට ගන්නා ලදි. නමුත් පසුව ඔහු නිදහස්කරන ලෙස ඉල්ලා දිවයින පුරා පෝස්ටර් ව්යාපාරයක් ගෙන යන ලද අතර 1970 ජූලි 09 නිදහස් කර ඇත. 1970 ජූලි 14 දින විද්යෝදය විශ්ව විද්යාලයේ දි CIA කාරයෝ නම් දේශණය පවත්වා ඇත. 1970 අගෝස්තු 10 මංගල රැළිය කොළඹ හයිඩ් පිටියේදී පවත්වයි. මේ වනවිට ජවිපෙ ප්රචාරක කටයුතු සඳහා පත්ර කිහිපයක් මුද්රණයකර තිබිණ. රතුලංකා,රතුබලය,ජනතා විමුක්ති, දේශප්රේමී,රතු කැකුලු යන පත්රයි.
[සංස්කරණය]
71 කැරුල්ල
1970 අගවන විට සමගි පෙරමුණු ආණ්ඩුව ජවිපෙ කෙරෙහි විශේෂ අවධානයකින් සිටින අතර 1970 අගෝස්තු 09 දින සමගි පෙරමුණු ආණ්ඩුවේ ලේකම්වරු තිදෙනා ජවිපෙ මර්දනය කිරීම සදහා ජනතා සහාය පතන ලදි. 1970 අගෝස්තු 12 ආරක්ෂක ලේකම් රත්නවේල් මහතා විසින් විශේෂ ප්රකාශයක් කරමින් චේ ව්යාපාර ආණ්ඩුවේ අංක එකේ සතුරා බවත් එය මුලිනුපුටා දැමිය යුතු බවත් ප්රකාශ කරයි. 1971මාර්තු 06 වන දින ඒවන විටත් ජවිපෙන් වෙන්ව සිටි ධර්මසේකර කණ්ඩායම විසින් ඇමරිකානු තානාපති කාර්යාලයට පහරදෙන ලදී. මේ සමග ආණ්ඩුව හදිසි නීතිය පනවන ලදී. 1971 මාර්තු 13 රෝහණ විජේවීර හා කෙලී සේනානායක අම්පාරේදී අත්අඩංගුවට ගෙන යාපනයේ රදවන ලදී. මේ තත්ත්වය තුළ ඒ වන විට ඉදිරිපෙළේ නායකයකුව සිටි පොඩි අතුල හෙවත් වික්ටර් අයිවන් කැරැල්ලට සූදානම් වෙයි. 1971 අප්රේල් 12 වන දින විද්යෝදය විශ්ව විද්යාලයේ සංඝාරාමයේ දී පහරදීම සදහා සාකච්ඡාවක් පවත්වන ලදී. ප්රථමයෙන් තීරණයකර තිබුනේ අප්රේල් 05 අළුයම පහර දීමටය.නමුත් පසුව එම තීරණය වෙනස් කරමින්.රාත්රී පහරදීමට තීරණය කෙරිණි.මේ පනිවිඩය මොනරාගල දිස්ත්රික්කයට අදාලව වෙනස්කිරීමට නොහැකි විය. පණිවිඩය මොනරාගල දිස්ත්රික්කයට අදාලව වෙනස් කිරීමට නොහැකි විම නිසා වැල්ලවාය පොලීසියට පහරදීම අප්රේල් 05 අලුයම සිදුවිය.එනිසා කැරැල්ල අසාර්ථවීමට එය හේතුවිණි. එහිදී පොලිස් ස්ථාන 92 කට පහරදුන් අතර 57 කට අලාභහානි සිදුවිය. තරුණ තරුණියන් දස දහසක් දෙනා මරණයට පත් වූඅතර 20,000 ක් පමණ සිරගත කෙරිණි.සැකකරුවන්ට දඩුවම් කිරීමට විශේෂ නීතියක් යටතේ ආණ්ඩුව කොමිසමක් පත් කරන ලදි.එය අපරාධ විනිශ්චය කොමිෂන් සභාව ලෙස හඳුන්වන ලදී.කොමිසන් සභාව මගින් පක්ෂ නායකයන්ට දඩුවම් පනවන ලදී. එයින් අනතුරුව සිරගෙදර සිට පක්ෂය ගොඩනැගීමට කටයුතු කරන ලදී.
[සංස්කරණය]
1976-83 දක්වා කාලවකවානුව
1976 හදිසි නීතිය ඉවත් කිරීමත් සමග පක්ෂය නීත්යානුකූල විය.නිදහස් වූ උපතිස්ස ගමනායක පක්ෂයේ වැඩකටයුතු ආරම්භ කරන ලදී. නියමුවා පුවත්පත ආරම්භ කරමින් නැවතත් ප්රචාරක රැලි ආරම්භ කරන ලදී.77 මැතිවරණයේ දී ආසන 4 කට ඉදිරිපත් වේ. තංගල්ල, බටහිර අනුරාධපුරය, හොරොව්පතාන හා හක්මන යන ආසන වලට සීනුව ලකුණින් ඉදිරිපත් විය.1977 දී අපරාධ විනිශ්චය කොමිසන් සභාව අහෝසි වීමත් සමඟ රෝහණ විජේවීර නිදහස් විය .78 පළමු සමුළුව ඉන්පසු පවත්වන ලදී. අනතුරුව 1978 නගර සභා මැතිවරණය සඳහා ස්වාධීනව තරග කර ඇත. 1981 දී දිස්ත්රික් සභා ඡන්දයෙන් නියෝජිතයන් 13 ක් පත්වී ඇත .1982 ජනාධිපතිවරණය සඳහා රෝහණ විජේවීර මහතා ඉදිරිපත් වී ලක්ෂ තුනකට ආසන්න ඡන්ද ප්රමාණයක් ලබාගෙන ඇත .
[සංස්කරණය]
1983 සිට 1994 දක්වා කාලසීමාව
1983 සුප්රසිද්ධ කළු ජූලිය ඇතිවෙයි. 1983 ජූලි 30 වනදා ජේ.ආර්. ජයවර්ධන රජය ජවිපෙ තහනම් කරයි. තහනම ඉවත්කර ගැනීම සඳහා කටයුතු කළද එය සාර්ථක නොවේ. ඉන්දු ලංකා ගිවිසුමත් සමග ඉන්දියන් හමුදාව පැමිණීම නිසා දේශප්රේමී සන්නද්ධ අරගලයක් ඇරබෙයි. මේ වකවානුව තුල ජවිපෙ තමන්ගේ සාම්ර්ප්රදායික ජනතා දැනුවත් කිරීම් තුලින් විශාල පිරිසක් මෙම 13 වන ව්යවස්ථා සංධශෝනයට එරෙහිව පෙලගැස්වීමට සමත් වීම නිසා එ.ජා.ප.ආණ්ඩුව 13 වන ව්යවස්ථා සංධශෝනයේ යෝජනා ක්රියාත්මක කිරීම පසෙක තබා මෙම අරගලය මර්දනය කිරීම අරඔයි. කෙසේ හෝ අවසානයේ බලයේ සිටි එ.ජා.ප.ආණ්ඩුව විසින් මෙම අරගලය මර්දනය කරයි. රෝහණ විජේවීර, උපතිස්ස ගමනායක ඇතුළු නායකයින් මරණයට පත් වෙයි. පිරිසක් විදේශ ගතවෙයි.දස දහස් ගණනක් සිරගත වීමට සිදුවෙයි. ඉතා විශාල දේපල හානියක් සිදුකල මෙම අරගලය මගින් ලක්ෂයකට ආසන්න තරුණ තරුණියන් ඇතුළු බොහෝ දෙනෙකුගේ ජීවිත අහිමි වෙයි.දේශපාලන බලමණ්ඩලය තුළ මරණයට පත් නොවී ජීවිතය බේරාගත්තේ සෝමවංශ අමරසිංහ මහතා පමණි.
[සංස්කරණය]
1994 සිට 2005 ජනාධිපතිවරණය දක්වා
1994 පොදුජන එක්සත් පෙරමුණ බලය ලැබීමත් සමග සිරගතව සිටි බොහෝ පිරිසකට නිදහස ලැබේ. 1994 මැතිවරණයට ජවිපෙ ලෙස තරඟ වැදීමට තීරණය කරයි. මහ මැතිවරණයෙන් හම්බන්තොට දිස්ත්රික්කයෙන් එක් ආසනයක් හිමිවෙයි. නිහාල් ගලප්පත්ති මහතා පාර්ලිමේන්තුවට පත්වෙයි. ඉන් අනතුරුව ඉදිරිපත් වූ මැතිවරණ තුළ 1997 පලාත් පාලන ආසන 101 ක් දිනාගන්නා අතර 1998 පලාත් සභා ආසන 25 ක් දිනයි. 2000 මහා මැතිවරණයෙන් ආසන 10 ක් දිනාගන්නා අතර 2001 දී එය 16 දක්වා වර්ධනය කර ගැනීමට සමත්වෙයි. උතුරු නැගෙනහිර අර්බුදය සම්බන්ධයෙන් දැරූ මතය හේතුවෙන් ශ්රී ලංකා නිදහස් පක්ෂය සමග එක්ව 2004 වර්ෂයේදී සන්ධානය ගොඩනගමින් එජාපය පරාජය කරයි. 2004 මහමැතිවරණයෙන් මන්ත්රීදූර 39 ක් දිනා ගැනීමට සමත්වෙයි. සුනාමි ව්යවසනය ඇතිවීම තුළ චන්ද්රිකා බණ්ඩාරනායක රජය L.T.T.E. සංවිධානය සමඟ සුනාමි සහන මණ්ඩල ගිවිසුමට අත්සන් කිරීමට සූදානම් වීමත් සමඟ සන්ධානයෙන් ඉවත්වෙයි. අධිකරණය හමුවට ගොස් සුනාමි සහන මණ්ඩලය අවලංගු කිරීමට සමත් වෙයි. නමුත් 2005 ජනාධිපතිවරණයේදී මහින්ද රාජපක්ෂ මහතා බලයට පත්කිරීම සඳහා විශාල වැඩකොටසක් ඉටු කරයි.
[සංස්කරණය]
2005 ජනාධිපතිවරණයෙන් පසු අද දක්වා
1994 වර්ෂයෙන් පසු ජවිපෙ දිගින්දිගටම පෙනී සිටියේ උතුරු නැගෙනහිර ප්රශ්නය සම්බන්ධයෙන් දැඩි ස්ථාවරයක. ඒකීය රටක් හා ත්රස්තවාදය යුධමය වශයෙන් පරාජය කළ හැකිය යන්න ප්රකාශ කරන ලදී. එවකට පැවති ජනමතය අනුව එය වර්තමාන තත්ත්වය දක්වා වෙනස් කිරීම සඳහා ජවිපෙ මැදිහත්වීම අමුතුවෙන් කිව යුතු නැත. උතුර-නැගෙනහිර පළාත් වෙන් කිරීම, කුප්රකට 'පීටොම්ස්්' ගිවිසුම හකුලා ගැනීම සඳහා ජවිපෙ විසින් ගත් නීතිමය ක්රියාමාර්ග සඳහා එවකට අගවිනිසුරු සරත් එන්. සිල්වා මහතා අගනා මෙහෙයක් කළ අතර එවක යුධහමුදාපති ජනරාල් සරන් ෆොන්සේකා මහතාට තම භටයන් සාර්ථකව මෙහෙයවීම සඳහා අවැසි පසුබිම ජවිපෙ විසින් දකුනේ ජනමතය සැකසීම මගින් පාදා දෙන ලදී. තවද මහින්ද රාජපක්ෂ මහතා බලයට පත්ව ත්රස්තවාදය යුධමය වශයෙන් පරාජයට පත්කිරීම සඳහා කටයුතු කළේය. මේ අතරතුර ජවිපෙ අභ්යන්තර අර්බුදය පැන නැගුණි. ඉතා තීරණාත්මක සන්ධිස්ථානයක් වූයේ විමල් වීරවංශ මහතා ඇතුළු පාර්ලිමේන්තු මන්ත්රීවරුන් 11 දෙනෙක් පක්ෂය හැරගොස් ජාතික නිදහස් පෙරමුණ පිහිටුවීමයි. මේ තත්ත්වය තුළ පසුගිය වයඹ, මධ්යම හා සඹරගමු පලාත් සභා මැතිවරණවලින් සැලකිය යුතු ප්රමාණයක් ඡන්ද අහිමිවීමක් සිදුව තිබේ. කෙසේ වෙතත් විමල් වීරවංශ සාධකයේ හැරයාම පිළිබඳ ජවිපෙ ඉතා නිහඬ පිළිවතක් අනුගමනය කරන බවක් පෙනේ.
රෝහණ විජේවීර සහෝදරයාගේ දේශපාලන ගුරුවරයා කොමියුනිස්ට් පක්ෂ නායක එස්. ඒ. වික්රමසිංහ ය. විජේවීර වික්රමසිංහගේ දේශපාලන දර්ශනය හැදෑරුවේ පාසල් වියේ සිටමය. අම්බලන්ගොඩ ධර්මාශෝක විද්යාලයේ උසස් අධ්යාපනය හැදෑරූ විජේවීර සිසුවා උසස් පෙළ කඩ ඉමෙන් ඉහළින්ම සමත් විය. විජේවීරගේ දක්ෂතා හොඳින්ම අවබෝධ කරගෙන සිටි කොමියුනිස්ට් පක්ෂයේ පීටර් කෙනමන් විජේවීරට වැඩිදුරටත් වෛද්ය විද්යාව හැදෑරීම සඳහා රුසියාවේ ලුමුම්බා විශ්වවිද්යාලට ඇතුළත්වීම සඳහා ශිෂ්යත්වයක් ලබා දුන්නේය. වසර හයකට එම විශ්වවිද්යාලයට ඇතුළත් වූ රෝහණ විජේවීර දක්ෂ ලෙස වෛද්ය විද්යාව හදාරමින් සිටියේය. එමෙන්ම මාක්ස්, ලෙනින්වාදී දර්ශනයන් ද අධ්යයනය කළේය. රුසියාවේ ආණ්ඩු ක්රමය, එරට ශීඝ්රයෙන් දියුණු වන ආකාරය දුටු රෝහණ විජේවීර ඔහුගේ ගුරුවරයාට වරක් මෙවැන්නක් පවසා තිබිණි.
"මටත් ලංකාවට ගිහින් ඔපරේෂන් එකක් තියෙනවා කරන්න. ලංකාවේ තියෙන ධනපති ආණ්ඩු ක්රමය වෙනස් කරන්න ඕනෑ. කොමියුනිස්ට් ආණ්ඩුවක් ගොඩනැඟීමයි මගේ එකම අරමුණ."
විජේවීරගේ මුවින් පිට වන ඒ වදන්වලට හොඳින් සවන් දී සිටි ඔහුගේ ගුරුවරයා අවසානයේ මෙවැනි පිළිතුරක් ලබා දී තිබිණි.
"ඔයා දක්ෂ වෛද්ය විද්යාවට නෙමෙයි. දේශපාලන විද්යාවටයි. මම කියන නිසා ඔයා දේශපාලන විද්යාවට මුල් තැන දෙන්න. දෙවනුව වෛද්ය විද්යාව හදාරන්න." යෑයි පැවසූ බව පසුකාලීනව අප සමග අඳුරු සිරකුටියක දිවි ගෙවන විට රෝහණ විජේවීර සහෝදරයා අපට පැවසීය.
කෙසේ වුවත් ගුරුවරයාගේ ගුරුහරුකම් මැද විජේවීර වෛද්ය විද්යාව පසෙකට දමා දේශපාලන විද්යාවට මුල් තැන දුන්නේය. වසර හතරක් හිමි හිමින් ගෙවී ගියේය. විජේවීර දේශපාලන දැනුම මුවහත් කරමින් සිටියේය.
එවකට කඹුරුපිටිය කොමියුනිස්ට් පක්ෂ මන්ත්රී ඒලියන් නානායක්කාර ජයග්රහණය කරවීමට පෙරමුණ ගත් අන්දිරිස් විජේවීර (රෝහණ වීජේවීරගේ පියා) එක්සත් ජාතික පක්ෂ මැරවරයන්ගේ අමානුෂික පහරකෑම්වලට ලක්ව රෝගාතුර විය. අත පය වාරු නැතිව යහනකට සිමා වී සිටි අන්දිරිස් විජේවීර මිය යන විට රෝහණ විජේවීර ලුමුම්බා සරසවියේ ජ්යෙෂ්ඨ සිසුවෙක් වී සිටියේය.
තව වසර දෙකකින් වෛද්ය උපාධියක් ගෙන ලුමුම්බා විශ්වවිද්යාලයට සමුදීමට හීන දුටු විජේවීර පියාගේ අකල් මරණය ආරංචි වීමත් සමග ලංකාවට පැමිණීමට තීරණය කළේය. පියාගේ අවසන් කටයුතු නිම කර දින ගණනක් ගෙවී ගියේය. වෛද්ය උපාධිය ලබාගැනීමට විජේවීරට තවත් වසර දෙකක් ඉතිරිව තිබිණි. ඒ වසර දෙකේ අධ්යයන කටයුතු අවසන් කර වෛද්ය උපාධිය ලබාගැනීම සඳහා විජේවීර රුසියාවේ ලුමුම්බා විශ්වවිද්යාලයට යා යුතුම විය. එහෙත් නැවත ලුමුම්බා විශ්වවිද්යාලයට යැමට විජේවීරට වීසා ලැබුණේ නැත. කොමියුනිස්ට් පක්ෂයෙන් විජේවීරට ලබා දී තිබූ ශිෂ්යත්වය ද පක්ෂ ලේකම් පීටර් කෙනමන්ම තහනම් කළේය. වෛද්යවරයෙක් වීම වීජේවීරට සිහිනයක් පමණක්ම විය. විජේවීර අලුත් ගමනක් යැමට තීරණය කළේය. ලංකාවේ විප්ලවකාරී දේශපාලන පක්ෂ ගැන සොයා බැලුවේය.
චීනයේ මාඕ සේතුං ආදර්ශයට ගනිමින් ලංකාවේ චීන පිලේ නායකයා ලෙස කටයුතු කළ එස්. සෙම්මුඛදාසන් සමග වීජේවීර අත්වැල් බැඳගත්තේ ඔය අතරතුර කාලයේය. දින සති මාස ගෙවී ගියේය. සෙම්මුඛදාසන්ගේ අඩුපාඩු තේරුම්ගත් විජේවීර චීන පිලෙන් ඉවත් වීමට තීරණය කළේය.
1966 මැයි මාසේ දිනක අක්මීමන කරු සහෝදරයාගේ නිවසට එකතු වූ රෝහණ විජේවීර ඇතුළු දහහතර දෙනකුගෙන් සමන්විත කණ්ඩායමක් නව පක්ෂයක් ගොඩනැඟීමට සාකච්ඡා කළහ. "ලංකා ලයින්" යෑයි නව නාමයකින් ගොඩනැඟුණු ඒ පිලේ ප්රබලයන් ලෙස කටයුතු කළේ රෝහණ විජේවීර, පියතිලක, ලොකු අතුල, සනත් සහ කරූය. මෙලෙස ගොඩනැඟූ පක්ෂයේ වැඩ කටයුතු ඔවුහු ඉදිරියට කරගෙන ගියහ. 1970 වර්ෂයේදී හම්බන්තොට දිවුල්ගමුවේදී විජේවීර සහෝදරයා ප්රථම වතාවට පොලිස් අත්අඩංගුවට පත් විය. බදුල්ල සිරගෙදරට රැගෙන ගිය රෝහණ විජේවීර සහෝදරයාගේ නැවත පැමිණීම ගැන ඔහුගේ අනෙකුත් සගයන් තුළ මතු වූයේ බියකි. සැකයකි.
ලංකා ලයින් පිලට නායකත්වය දුන් විජේවීර සිරගත වුවද ඔහුගේ සෙසු සගයෝ ශක්තිමත් වූහ. විජේවීර නිදහස් කරගැනීමට ඔවුන් නොගත් උත්සාහයක් නැත. අවසානයේ ඔවුන් "ජනතා විමුක්ති පෙරමුණ" කියන නමින් "රෝහණ විජේවීර වහාම නිදහස් කරමු" යන සටන් පාඨයෙන් ලංකාව පුරා පෝස්ටර් ව්යාපාරයක් ද ගෙන ගියේය. රෝහණ වීජේවීර බදුල්ල සිරගෙදරින් නිදහස් විය. එවකට රාජ්ය පාලකයා ලෙස කටයුතු කළේ ඩඩ්ලි සේනානායකය. 1970 මැතිවරණයෙන් පසු ජනතා විමුක්ති පෙරමුණේ නායකයෝ ඒකමතික තීරණයක් ගත්හ. "කැඳ ගන්නවාද? ඇල්වතුර ගන්නවාද?" අවසානයේ යූ.එන්.පී ය පරදවා සිරිමාවෝ මැතිනියගේ ආණ්ඩුවට සහාය දීමට ජවිපෙ තීරණය කළේය.
විජේවීර හැර සෙසු නායකයෝ වේදිකාවට ගොඩ වූහ. ලොකු අතුල ද බෙලිඅත්තේදී සමගි පෙරමුණේ වේදිකාවකදී ජනතාව ඇමතුවේය. ඒ මැතිවරණයෙන් මැතිනිය ජයග්රහණය කළාය. සමගි පෙරමුණු ආණ්ඩුවක් ඇති විය. එහෙත් ජවිපෙ විප්ලවකාරී ක්රියා පිළිවෙත නොනැවතිණි. මැතිනියගේ රජය ජවිපෙට දිගටම විප්ලවවාදී වැඩ කරගෙන යැමට ඉඩ දෙයි කියා විජේවීර සිතුවද? එය එසේ නොවීය. ජවිපෙ රැස්වීම්වල දේශන පවත්වා වේදිකාවෙන් බිමට බහින කථිකයන් පවා එදා මැතිනියගේ රජය අත්අඩංගුවට ගත්තේය. එවකට අධිකරණ ඇමැති ලෙස කටයුතු කළේ පිලික්ප් ඩයස් බණ්ඩාරනායකය. අධිකරණ අමාත්යාංශයේ ලේකම් වශයෙන් කටයුතු කළේ නිහාල් ජයවික්රමය. රජයට එරෙහිව නැඟී සිටින ප්රධාන හතුරා වන ජනතා විමුක්ති පෙරමුණ සමූල ඝාතනය කරන්නැයි එවකට රජයේ ප්රධානීහු ආරක්ෂක අංශවලට නියෝග කළහ. ජවිපෙ ක්රියාකාරිත්වය මර්දනය කිරීමට ඒ අනුව ආරක්ෂක අංශ විවිධාකාරයෙන් ක්රියාත්මක විය. ජවිපෙයට එලව එලවා පහර දුන්නේය. ජවිපෙ විප්ලවවාදී ජීවගුණය රැකගැනීම පිණිස 1971 අප්රේල් 05 වැනිදා වැල්ලවත්තෙන් ආරම්භ කිරීමට නියමිතව තිබූ පහරදීම අවසානයේ වැල්ලවායෙන් ජවිපෙ පළමු වෙඩි මුරය වාතලයට මුසු කළේය. ඉනිදු නොනැවතුණු ජවිපෙ වැඩි කාලයක් නොගොස් ඇල්පිටිය, හක්මන, ඌරගහ, කෑගල්ල පොලිසිවල බලය ඔවුන්ගේ ග්රහණයට නතු කර ගත්තේය. එවකට මතුගම, අගලවත්ත, බුලත්සිංහල යන ප්රදේශවල ජවිපෙ අණදෙන නායකයා ලෙස කටයුතු කළේ "මතුගම දයා" හෙවත් මමයි.
එකල ආරක්ෂක අංශ විසින් ජවිපෙ සාමාජිකයන් විශාල පිරිසක් ඝාතනය කරනු ලැබිණි. තවත් විශාල පිරිසක් අත්අඩංගුවට ගත්හ. අප සමග එකට සිරබත් කෑ එක් සාමාජිකයකු පොලිස් පහර කෑම් නිසා සිර කුටියේදීම අවසාන හුස්ම පොද වාතලයට මුසු කිරීමට මොහොතකට පෙර සිර කුටියේ බිත්තියේ සටහන් කළ කවි පද හතර මගේ මතකයෙන් තවමත් මැකී ගොස් නොමැත.
මැතිවරණයෙන් ජන රවටන ලද බලය
උරුමෙන් ලද ද තී යෙදුවේ යුද බලය
තරුණන් මැරූ සුදු අදිරද සුරතලිය
මරණෙන් පසුත් ගන්නෙමි ලේවල පලිය
වමක් ගොඩනැඟීමේ අරමුණින් ජීවිත පරිත්යාගයෙන් සටන් කර සිරගත වූ තවත් සහෝදරයන් එදා සිරකුටියේදී අඟුරු කෑලිවලින් සටහන් කළ කවි පද, ගී පද තවමත් මගේ දෙසවනේ දෝංකාර දෙයි.
පරවී ගියත් පිපිදෙන රතු මල් කැකුළු
පිපිදෙනු නියතමයි නැවතත් රතු කැකුළු
නිදහස පතා ඔබ හෙලු දහදිය කඳුළු
හරි බව කියනු ඇත මතු හදවත් සියළු
එවකට ජවිපෙ සහෝදරයන් හැටදහසක් පමණ සිරගත කරමින්, විසිදහසකට ආසන්න ප්රමාණයක ජීවිත අහිමි කරමින් එදා ජවිපෙ මර්දනය කළේ මැතිනියගේ ආණ්ඩුවයි. ජීවිත පරිත්යාගයෙන් ගොඩනැඟූ ජවිපෙ වර්තමාන නායකයෝ චන්ද්රිකා රජය සමග සන්ධානගත වෙමින් චන්ද්රිකා ජයග්රහණය කරවීමට දර දිය ඇද්දහ. ජවිපෙ ආරම්භයේ තිබූ මාක්ස්, ලෙනින්වාදී න්යාය ජවිපෙ වර්තමාන නායකයන්ගෙන් හිමි හිමින් ගිලිහී ගිය බව සඳහන් කළ යුතුමය.
විශේෂයෙන්ම සටහන් කළ යුත්තේ මෙයයි. ධනපති ආණ්ඩුවල ඇමැතිකම්වලට යටවුණු වර්තමාන ජවිපෙ නායකයන් කොහේ සිට පැමිණියේද? විජේවීර සහෝදරයාවත් හරි හැටි නොදැකපු මේ නායකයන් එදා කොහේ සිටියේද? ජවිපෙ පූජනීය සහෝදරවරුන් සිහිගන්වමින් ඉටි පන්දම් පත්තු කර විරු දින සැමරුවාට ධනපති ආණ්ඩු සමග සන්ධානගත වෙමින් කර කී දේ මැකීමට නොහැකිය.
සිදුවීම් සිදුවන්නේ කොක් හඬලා සිනාසීමටවත් ලතැවීමටවත් නොව, එය අත්දැකීම් වශයෙන් ගෙන ඉදිරියට යන්න කියා වරක් කාල්මාක්ස් කියා තිබේ. එහෙත් වර්තමාන ජවිපෙන් එවැන්නක්වත් නොපෙනේ. කෑලි කැඩි කැඩී යන ජවිපෙ ගැන විශාල ලෙස කැපවීම් කළ අප වැනි අයට නිර්දන පන්ති හා ගොවි කම්කරු ජනතාවට කරුණු කරණා පැහැදිලිs කරදීමට මට සිතිණි. මිරිඟුවක් පිටුපස දුවන වර්තමාන ජවිපෙ නායකයන්ට තව තවත් ජනතාව රැවැටීමට ඉඩ දී බලා සිටීමට නොහැකිය. ජනතා විමුක්ති පෙරමුණේ විප්ලවීය ප්රතිපත්ති ප්රකාශය හය වතාවක් මුද්රණය කර ඇති බවත් ඒ ප්රතිපත්ති ප්රකාශයට පටහැනිව කටයුතු කළ ආකාරය ගැන... ජවිපෙ න්යායය... අධිරාජ්යවාදී එංගලන්තයේ පිහිට පතා එරටට පැන ගිය නායකයන් ගැන... 1971 වර්ෂයේදීත්, 1988 දීත් ජනතාව වෙනුවෙන් සිරබත් කෑ දයා මතුවටත් හෙළි කරයි...
1971 කැරැල්ලේදී සිරගත වූ ජවිපෙ සහෝදරවරුන් පක්ෂය ගැන කලකිරුණු අවස්ථාවේ ජවිපෙ දර්ශනය කුමක්ද යෑයි නැවත දැනුවත් කිරීම් වස් රෝහණ විජේවීර සහෝදරයා මාක්ස් ලෙනින්වාදී ඓතිහාසික භෞතිකවාදය සම්බන්ධතාව 14,15,16,17 සහ 18 පරිච්ජේදයන් සිර කුටියේදී අකුරු කළේය. ඒ සටහන් පොත අදටත් සුරැකිව පණ මෙන් මම ආරක්ෂා කරන්නෙමි. විජේවීර සහෝදයාගේ අත්අකුරින් ලියූ සටහන් පොත ඔබගේ දැනගැනීම පිණිස මේ ලිපි පෙළත් සමග අපි ඉදිරිපත් කරන්නෙමු.
සකස් කළේ - තරංග රත්නවීර
"මට හරියට නිදාගන්න පුළුවන් පක්ෂය ගොඩගත්තු දාටයි.."
1970 මැතිවරණයේදී එක්සත් ජාතික පක්ෂය පරාජය කර මැතිනියගේ සමගි පෙරමුණ ජයග්රහණය කරවීමට ජවිපෙ සහෝදරවරු ඒකමතිකව තීරණය කළහ. විජේවීර හැර සෙසු නායකයෝ සමගි පෙරමුණේ වේදිකාවලට නැග අධිරාජ්යවාදී යූ.එන්.පි. ය පරාජය කිරීමට අත්වැල් බැඳගන්නැයි ජනතාව ඉදිරියේ කෑ මොර දුන්හ. ඒ මැතිවරණයේදී සමගි පෙරමුණ ජයග්රහණය කරවීමට නව සාමාජිකයෙක් ද ජවිපෙට එකතු වූයේය. ඒ ඩී. අයි. ජී. ධර්මසේකර ය.
"ධර්මසේකර කළුතර දිස්ත්රික්කයේ ජනතා විමුක්ති පෙරමුණේ ක්රියාකාරී සාමාජිකයෙක් වුණා. අලුත්ගම නගරයට ආසන්න සහෝදරයකුගේ නිවසකට ජවිපෙ සාමාජිකයන් එකතු වෙලා සාකච්ඡාවක් පැවැත්වූවා. ඒක සංවිධානය කරලා තිබුණේ ධර්මසේකර. එදා විජේවීර සහෝදරයත් ඒ සාකච්ඡාවට ඇවිත් තිබුණා. විජේවීර සහෝදරයා එතැනින් ඉවත් වෙලා ගියාට පස්සේ ධර්මසේකර එතැන හිටිය සහෝදරවරුන්ගෙන් මෙහෙම අහලා තියෙනවා."
"කොහොමද මං හදපු ගෝලයා. මටත් වඩා හොඳට කරුණු පැහැදිලි කළා නේද?"
එතැන හිටිය සහෝදරවරු විජේවීර සහෝදරයා මුණගැසුණු වෙලාවක ධර්මසේකර කියපු දේවල් අකුරක් නෑරම කියලා තිබුණා. පස්සේ විජේවීර සහෝදරයා ධර්මසේකර ගෙන්වලා මෙන්න මෙහෙම කියලා තියෙනවා.
"සහෝදරයා... මේ පක්ෂය ගොඩනැගුවේ ජනතාවට නායකත්වය දීලා නිර්ධන පන්තිය එකරාශී කර විප්ලවවාදී ආණ්ඩුවක් ගොඩනගන්නයි. සහෝදරයා පක්ෂය ඇතුළේ ඉඳගෙන කැපී පෙනෙන පෞද්ගලිකවාදය ගොඩනඟන්න යන්න එපා."
ජවිපෙ අතීතය දයා මෙසේ ආවර්ජනය කරමින් සිටියි......
දින සති හිමි හිමින් ගෙවී ගියේය. ධර්මසේකර කළුතර දිස්ත්රික්කයේ ක්රියාකාරී සාමාජිකත්වයෙන් ඉවත් කර අනුරාධපුර දිස්ත්රික්කයට මාරු කර යෑව්වේය. එහෙත් ඔහුගේ ප්රතිපත්ති වෙනස් වූයේ නැත. අනුරාධපුරට ගිය ධර්මසේකර කළුතර දිස්ත්රික්කයේදී මෙන්ම ජවිපෙ ප්රතිපත්ති යට කරමින් ඔහුගේ පුද්ගලික ප්රතිරූපය ගොඩනැඟීමට ප්රයත්න දැරූ බවට චෝදනා නැගෙයි. ධර්මසේකර දෙබිඩි ක්රියාපිළිවෙතක් අනුගමනය කරන බව ජවිපෙ සහෝදරවරුන්ට අවබෝධ විය. ඔවුහු ධර්මසේකරට එරෙහිව නැගී සිටියහ. නන්දන මාරසිංහ සහෝදරයා ධර්මසේකර ගෙන යන වැඩපිළිවෙළ ගැන විජේවීර සහෝදරයා දැනුවත් කළේය. ධර්මසේකරගේ ක්රියාපිළිවෙත ගැන පෙර සිටම හොඳින් අවබෝධ කරගෙන සිටින විජේවීර සහෝදරයා ධර්මසේකරව මාස දෙක තුනකට පක්ෂ ක්රියාකාරිත්වයෙන් ඉවත් කිරීමට තීරණය කළේය. අවසානයේ විජේවීර ධර්මසේකර සහෝදරයාව ජවිපෙ සාමාජිකත්වයෙන් සම්පූර්ණයෙන්ම නෙරපා හැරියේය.
ජවිපෙන් ඉවත් කළ ධර්මසේකර ඔහුගේ නායකත්වයෙන් සංවිධානයක් ගොඩනඟා ගත්තේය. ඇමරිකාව විසින් වියට්නාමයට බෝම්බ දමා ජනතාව ඝාතනය කරනවාට විරුද්ධව අපේ රටේ ඇමරිකා තානාපති කාර්යාලය ළඟ 1971 මාර්තු 6 වැනිදා උද්ඝෝෂණ කළේ ධර්මසේකරගේ ඒ සංවිධානයයි. එදා පොලිසියේ ඉහළ නිලධාරියෙක් සමග ඇති වූ බහින් බස්වීමක් දුරදිග යැමක් නිසා ධර්මසේකර කණ්ඩායමේ එක් සමාජිකයකුට පිහි ඇනුම් පහරක් කෑමට ද සිදු විය. ඒ වන විට මැතිනියගේ සමගි පෙරමුණ ආණ්ඩුව බලයට පත් වී අවුරුද්දක් ගත වූවා පමණි. සමගි පෙරමුණ ආණ්ඩුවට විරුද්ධව ජවිපෙ ගෙන ගිය විප්ලවකාරී වැඩපිළිවෙළ ද ප්රචණ්ඩකාරී ස්වරූපයක් ගත්තේය.
මැතිනියගේ රජයට එරෙහිව නැගී සිටින ප්රධාන සතුරා ජවිපෙ බව ඔවුන්ට හැඟිණි. තව තවත් ලෙඩේ උඩු දුවන්නට පෙර ප්රතිකාර කිරීම සුදුසු යෑයි සිතූ එවකට රජයේ ප්රධානීහු රජයට එරෙහිව නැඟී සිටින ප්රධාන හතුරා වන ජනතා විමුක්ති පෙරමුණ මර්දනය කරන්න යෑයි ආරක්ෂක අංශවලට නියෝග කළහ. ජවිපෙ ක්රියාකාරිත්වය මර්දනය කිරීමට ඒ අනුව ආරක්ෂක අංශ විවිධාකාරයෙන් ක්රියාත්මක විය. ජවිපෙට එළව එළවා පහර දුන්නේය. ජවිපෙ විප්ලවවාදී පක්ෂයක් ලෙස අප්රේල් මස 05 වැනිදා උදෑසන ප්රථම වරට වැල්ලවත්ත පොලිසියට පහරදී ආයුධ අතට ගැනීමට තීරණය කර තිබුණද, අවසානයේ ඒ තීරණය වෙනස් කරමින් වැල්ලවාය පොලිසියට ජවිපෙ පළමු වෙඩි මුරය මුදාහැරියේය.
"ඒ දවස්වල පොලිසිවලට පහර දුන්නේ නොම්බර 12 තුවක්කු කිහිපයකින්. කෑගල්ලේ පොලිසියට රතිඤaCදා පත්තු කරලා විසි කළාම පොලිස් රාළහාමිලා පණ එපා කියලා දිව්වලු. එදා කෑගල්ල පොලිසියේ තුවක්කු සේරම අපේ සහෝදරවරු අරගෙන තිබුණා. එදා තමයි (අප්රේල් 08 වැනිදා) රට පුරාම ඇඳිරි නිතීය දාලා ජනතා විමුක්ති පෙරමුණේ සාමාජිකයන්ට දිසාපති කාර්යාල, පන්සල්වලට ගිහින් පොලිසියට භාර වෙන්න කියලා මැතිනිය හෙලිකොප්ටර්වලින් පත්රිකා බෙදුවේ. ඒත් අපේ සාමාජිකයෝ පොලිසියට භාර වුණේ නැහැ. ඊට පස්සේ තමයි මැතිනිය ටයර් සෑය ගෙනාවේ. අපේ සහෝදරවරුන්ව පණ පිටින් ටයර් දමා පිච්චුවා. තවත් සාමාජිකයන්ව වධකාගාරවල තියාගෙන දස වධ දුන්නා. බද්දේගම කමලබන්දු සහෝදරයාගේ දකුණු අත විදුලි කියතකින් කපන කොට ඒ සහෝදරයා මෙහෙම කිව්වාලු."
"ලාංකීය විප්ලවය දිනේවා! ජනතා විමුක්ති පෙරමුණ දිනේවා! මේ අතින් පිට වන රතු ලේවලින් රතු ආණ්ඩුවක් ඇති වේවා!"
ඒ එක් සහෝදරයකුගේ ඉල්ලීමක් විතරයි. මේ වගේ සහෝදරවරු විසිදාහක් විතර එදා කෲර විදිහට ඝාතනය කළා. යටියන්තොට ඇන්තනී සහෝදරයා විදුලි කියතකින් පපුව පළා කකුල් දෙක කපන්න කලින් ඒ සහෝදරයත් පොලිසියෙන් මෙන්න මෙහෙම ඉල්ලීමක් කර තිබුණා.
"මාව මරන්න ඉස්සෙල්ලා ඉතිහාසයට එකතු කරන්න කවියක් කියන්න ඉඩ දෙන්න"
කාකි කෝට් ඇඳගත්තු පොලිස් නිලධාරීන් අතර මිනිස්කම තිබුණු පොලිස් නිලධාරියෙක් "දැන් අපි උඹව කොහොමත් මරනවා. අපට දැනගන්නත් එක්ක උඹේ කවිය කියපන්" කියලා ඒ සහෝදරයාගේ අවසන් ඉල්ලීමට අවසර දීලා තිබුණා.
ඔබ මියගිය සොහොන මත්තේ පුදන්නට
නෙක විසිතුරු මල් මාලා නැත අපට
ඇත්තේ සටන් කාමය නිති අවදි කොට
පුද දෙමි සොහොයුරාණෙනි ඔබගේ විරුනමට
යටියන්තොට සහෝදරයා ඒ කවිය කිව්වට පස්සේ ඔහුගේ බඩ කපා, අත් දෙක කපා යටියන්තොට නගරයට ගෙනත් ටයර් දමා ගිනි තියලා තිබුණා.
කෑගල්ලේ කණ්ණාඩි අබේ සහෝදරයාගේ මල්ලිව අත්අඩංගුවට ගෙන ඝාතනය කරන්න හදනකොට ඒ සහෝදරයා මෙහෙම කියලා තිබුණා.
"තොපි මරන මරන කෙනෙක් පාසා, තොපි පලන පලන පලුවක් පාසා, තොපි අපව විනාශ කළත් අපි නඟපු හඬ කවදා හෝ මේ රටේ රතු ආණ්ඩුවක් ගොඩනඟනවා." මේ දේවල් විජේවීර සහෝදරයා අපට කිව්වේ සිරගත වෙලා ඉන්නකොට.
විජේවීර සහෝදරයා 1977 සිරගෙදරින් නිදහස් වුණාට පස්සේ ප්රථම සම්මේලනය තිබ්බේ කොළඹ සුගතදාස ක්රීඩාංගණයේ. ඒ සම්මේලනයට ආපු මම එදා ගෙදර ගියේ නැහැ. ආමර් විදීයේ පිහිටි අපේ ප්රධාන කාර්යාලයේ නතර වෙලා රතු ආණ්ඩුවක් ගොඩනඟන්න කැප වුණා. කකුල් දෙකට වළල්ලක් හදාගෙන ලයිට් කණුවල නැගලා සැරසීම් කළේ අපි. පක්ෂයේ කවුරු හරි දෙන ෂර්ට් එකක්, කලිසමක් තමයි එදා අපි ඇන්දෙ. ඇඳුම්-පැළඳුම්, කෑම් බීම් ගැන එදා අපේ සහෝදරයෝ හිතුවේ නැහැ. තියෙන දෙයක් කාලා පක්ෂය ජයග්රහණය කරවීමට කැප වුණා." දයාගේ මතකය එසේ වචනවලට පෙරළිණි.
මැතිනියගේ ආණ්ඩුව ජවිපෙ සහෝදරවරුන් මර්දනය කිරීමට නොගත් උත්සාහයක් නැත. ජවිපෙ සහෝදරවරු මඟ තොටේ ටයර් දමා පුච්චා දැමූහ. වධකාගාරවල රඳවාගෙන දස වධ දුන්හ. ඉනිදු නොනැවතුණු සමගි පෙරමුණ ජවිපෙ මර්දනය කරන්නැයි කියා විදේශ රටවල් දහහතක ආධාර පැතුවේය. අනුර බණ්ඩාරනායක රුසියාවට ගොස් එරට රජයට මෙසේ දුක්ගැනවිල්ලක් ඉදිරිපත් කර තිබිණි. "අපේ ආණ්ඩුව පෙරළා චීන ලයින්කාරයෝ වගයක් බලය ගන්න හදනවා. අපට ආධාර දෙන්න මේ කැරලිකාරයන්ගෙන් රට බේරාගන්න." රුසියාවෙන් එසේ ආධාර පතන අනුර චීනේ ගිහින් පැවසුවේ මෙවැන්නකි. "රුසියන් ලයින්කාරයෝ වගයක් අපේ ආණ්ඩුව පෙරළන්න කැරැල්ලක් ගෙන යනවා. කැරැල්ල මර්දනය කරන්න අපට ආධාර දෙන්න." මාක්ස් ලෙනින්වාදී දර්ශනයන් හොඳින් අවබෝධ කරගෙන සිටි කියුබාවේ පිදෙල් කැස්ත්රොaගෙන් ද ජවිපෙ මර්දනය කිරීමට අනුර ආධාර පැතුවේය. එහෙත් සමගි පෙරමුණට ජවිපෙ මර්දනය කිරීමට කියුබාවේ නම් ආධාර ලැබුණේ නැත.
"කැරැල්ලේ මහ නඩුවෙන් නිදහස් වුණාට පස්සේ රෝහණ විජේවීර, කෙලී සේනානායක, ලයනල් බෝපගේ ඇතුළු තවත් සහෝදරවරුන් කිහිපදෙනකුට කියුබාවේ හවානා නගරයේ පැවැත්වෙන සම්මේලනයට සහභාගි වන ලෙස කියුබන් ජනාධිපති පිදෙල් කැස්ත්රොa ලංකාවේ කියුබන් තානාපති මාර්ගයෙන් රෝහණ සහෝදරයාට ආරාධනා කරලා තිබුණා. රෝහණ සහෝදරයා පිදෙල්ගේ ආරාධනාව පිළිගෙන තවත් සහෝදරවරුන් කිහිප දෙනකු සමග ඒ සම්මේලනයට සහභාගි වෙලා තිබුණා. සමසමාජ පක්ෂයේ ආචාර්ය කොල්වින් ආර්. ද සිල්වා, අතාවුද සෙනෙවිරත්න යන මහත්වරුන්ද ඒ සම්මේලනයට සහභාගි වුණාලු. සම්මේලනය පවත්වන භූමිය තුළ ජනතා විමුක්ති පෙරමුණේ ධජය ද ඔසවා තිබිලා තියෙනවා. මහා රෑ ජාමේ අතාවුද සෙනෙවිරත්න හොරෙන් හොරෙන් ඇවිත් ජවිපෙ කොඩිය කපනවා විජේවීර සහෝදරයා ඇස් දෙකෙන්ම දැකලා තිබෙනවා. විජේවීර සහෝදරයා ඒ කතාව මට කිව්වේ වර්තමාන ජවිපෙ නායක සෝමවංශ අමරසිංහ සහෝදරයාගේ විවාහ උත්සවයට යන අතරතුරදී. සෝමවංශ සහෝදරයාගේ විවාහ උත්සවය ඔහු පදිංචිව සිටි පයාගල නිවසේදී චාම් විදිහට පැවැත්වුණා. විජේවීර සහෝදරයා මංගල උත්සවයට සහභාගි වෙලා හිටපු පිරිස අමතා පුංචි කතාවක් කරලා අපි දෙන්නා මඟුල් ගෙදරින් පිට වෙන්න හදනකොට සෝමවංශ සහෝදරයාගේ වැඩිමහල් සොහොයුරා එයාගේ කාර් එකෙන්ම අපව කළුතර නගරයට ගෙනත් ඇරලුවා. කළුතරින් කොළඹ බස් එකක නැගලා අපි කෙළින්ම කොළඹ ආවා." දයා එසේ කීවේය.
ගිගුම් දෙන අහස වෙනදාටත් වඩා අඳුරුය. අතු ඉති සොලවන සුළඟ කෙමෙන් කෙමෙන් ප්රචණ්ඩ විය. පොලිස් ජීප් රථ ද ඉඳහිට මඟ තොටේ නොගියාම නොවේ. පොලිස් නිලධාරීහු කිසිදු අයුරිකින් විශ්වාස කළ නොහැකි සත්වයෙක් ලෙස එදා ජවිපෙ සහෝදරයා හැඳින්වූහ. "සහෝදරයා... පෑවිල්ල ඉවරයි වගේ. අද නම් වහින ලකුණු නේද තියෙන්නෙ. අපි ටිකක් ඉක්මනට අඩි උස්සමුද?" කෑලි කැපිය හැකි අඳුර මැදින් දයා රෝහණ සහෝදරයාගේ මුහුණ දෙස බැලීය. විජේවීර සහෝදරයා ද දයා කියූ දේ පිළිගෙන ගමන වේගවත් කළේය. පිටකොටුව බස් නැවතුම්පළේ සිට ආමර්වීදියේ ජවිපෙ ප්රධාන කාර්යාලයට ඒමට ඔවුන් දෙදෙනාට වැඩි වේලාවක් ගත වූයේ නැත. අහස පෙරළන්නාක් සේ පුපුරා ගිය හෙණ ගෙඩි කෙමෙන් පහව ගියේය. නියඟයට බියෙන් මෙන් වැස්ස ඈතින් ඈතට ගියේය.
"එදා අපි කාර්යාලයට එනකොට ලයියා හෙවත් ලයනල් බෝපගේ සහෝදරයයි තවත් සහෝදරවරුන් කිහිප දෙනෙකුයි කාර්යාලයේ සිටියා. කළු මල්ලි මහ රෑම අපි දෙන්නට කෑම පැකට් දෙකකුත් ගෙනත් දුන්නා. රෝහණ සහෝදරයා ඇඳගෙන හිටිය සුදු ෂර්ට් එක ගලවලා මට කිව්වා "දයා නාන්න යනවා නම් මෙන්න මේකත් පොඩ්ඩක් හෝදගෙන එන්න" කියලා. එදා රෑ රෝහණ සහෝදරයා මට ඇඳුම් හෝදන්න දුන්නාහම මම හිනාවෙලා කිව්වා.. "සහෝදරයා සතියකට පාරක්වත් නාන්න කෝ" කියලා. එතකොට විජේවීර සහෝදරයා මෙහෙම කිව්වා. "දයා මේ පක්ෂය ගොඩගන්න නම් වැඩිපුර ඇවිදින්න ඕනෑ. මහන්සි වෙන්න ඕනෑ. වැඩියෙන් මහන්සි වුණු දවස්වලට මම පුරුදු වෙලා තියෙන්නේ මූණකට විතරක් හෝඳගෙන, තියෙන දෙයක් කාලා පොඩ්ඩක් ඇහැ පියාගන්නයි. ඉතිං බලන්න හැමදාම මහන්සි වෙනවා. මගේ වැඩවලට රැයක් දහවලක් නැහැ. මට හරියට නිදාගන්න පුළුවන් මේ පක්ෂය ගොඩගත්ත දාටයි." රෝහණ සහෝදරයා එදා කියූ ඒ වචන ටික මගේ හදවතේ තවමත් දෝංකාර දෙනවා.
තරංග රත්නවීර